Votre progression

Vòstra progression

 

Los contenguts de cada leçon son pensats per vos permetre d’efectuar doas oras setmanièras de trabalh personal.

S’i apondon los escambis orals amb vòstre formator que se pòdon complir dirèctament en passant pel site, per telefòn o per Skype. Lor durada pòt èsser de mièja-ora fins a l’orada. Lor frequéncia es setmanièra. Estimam lo vòstre trabalh personal ebdomadari a doas oras en autonomia sul site, mai una ora maximum amb lo formator.

A la fin de vòstra formacion, deurètz passar un tèst de sortida que vos permetrà de pagelar vòstra evolucion.

Lo tablèu çai-jós vos permetrà de visualizar las exigéncias de cada nivèl del CECRL (Cadre Europèu de Referéncia per las Lengas) qu’es a l’ora d’ara la nòrma en matièra d’ensenhament de las lengas.

 

Nivèl CECRL del modul

Vòstres objectius

Modul 1 :
A1 - A2

Nivèl elementari : compreension de l’environament immediat

Compreension de l’Oral (CO) : Podètz compréner d’expressions e un vocabulari tras que frequent relatius a çò que vos tòca de prèp (per exemple : ieu-meteis, la familha, las crompas, l’environament de prèp, lo trabalh). Podètz compréner l’essencial d’annoncis e de messatges simples e clars.

Compreension de l’escrit (CE) : Podètz legir de tèxtes plan corts e fòrça simples. Podètz trobar una informacion particulara e previsibla dins de documents corrents coma son la rubrica dels annoncis brèus, los prospèctus, los menuts e los oraris. Podètz compréner de letras personalas cortas e simplas.

Expression Orala en Interaccion (EOI) : Podètz communicar al moment de complir de prètzfaits simples e costumièrs que non demandan qu’un escambi d’informacions simple e dirècte tocant a de subjèctes e activitats familiars. Podètz aver d’escambis brèus quitament se, d’un biais general, non ne sabètz pro per téner una convèrsa.

Expression Orala de Continua (EOC) : Podètz emplegar una tièra de frasas o d’expressions per descriure amb de tèrmes simples vòstra familha e d’autras gents, las vòstras condicions de vida, vòstra formacion e vòstra activitat professionala actuala o recenta.

Expression escrita (EE) : Podètz escriure de nòtas e messatges simples e cortets. Podètz tanplan escriure una letra personala fòrça simpla, per exemple de mercejadas.

Modul 2 :
B1

Nivèl Sulhet : nivèl intermediari

CO : Podètz compréner los punts essencials tre qu’un lengatge clar e estandard es emplegat per parlar de causas familiaras tocant al trabalh, a l’escòla, als lésers, etc... Se se parla d’un biais lent e articulat, podètz compréner lo gròs de la màger part d’emissions de ràdio e de television tocant a l’actualitat o de subjèctes que vos interèssan personalament o professionalament.

CE : Podètz compréner de tèxtes redigits essencialament dins una lenga correnta o relativa a vòstre trabalh. Podètz compréner la descripcion d’eveniments, l’expression de sentiments e de desirs dins de letras personalas.

EOI : Podètz téner cap a la majoritat de las situacions que se rencontran al moment d’un viatge dins un airal ont la lenga es parlada. Sens preparacion, podètz préner part a una convèrsa sus d’unes subjèctes familiars o d’interès personal. Podètz intervenir dins de convèrsas que concernisson la vida vidanta (per exemple : familha, lésers, trabalh, viatge e actualitat).

EOC : Podètz articular d’expressions d’un biais simple per fin de contar d’experiéncias e d’eveniments, dire vòstres sòmis, vòstras esperanças o vòstras tòcas. Podètz balhar sommariament las rasons e las explicacions de vòstras opinions e projèctes. Podètz contar una istòria o l’intriga d’un libre o d’un filme e exprimir vòstras reaccions.

EE : Podètz escriure un tèxte simple e coërent sus de subjèctes familars o que vos interèssan personalament. Podètz escriure de letras personalas per descriure experiéncias e impressions.

Modul 3 :
B2

Nivèl Independent : independéncia lingüistica :

CO : Podètz compréner de conferéncias o de discorses pro longs, e quitament seguir una argumentacion complèxa se lo subjècte vos es relativament familiar. Podètz compréner la màger part de las emissions de television tocant a l’actualitat e las informacions. Podètz seguir la màger part dels filmes en lenga estandard.

CE : Podètz legir d’articles e de rapòrts sus de questions contemporanèas dins los quals los autors adòptan una postura particulara o un vejaire singular. Podètz compréner un tèxte literari contemporanèu en pròsa.

EOI : Podètz communicar amb un degrà d’aisidesa e d’espontaneïtat que rendon possibla una interaccion normala amb un locutor natural. Podètz participar activament a una convèrsa dins de situacions familiaras e presentar e defendre vòstras opinions.

EOC : Vos podètz exprimir d’un biais clar e circomstanciat sus un volum espandit de subjèctes relatius als interèsses vòstres. Podètz desvolopar un vejaire sus un subjècte d’actualitat e explicar los avantatges e los inconvenients de possibilitats diferentas.

EE : Podètz escriure de tèxtes clars e circomstanciats sus un volum espandit de subjèctes relatius als interèsses vòstres. Podètz escriure un assag o un memòri en transmetent una informacion o en espausant de rasons, per o contra una opinion balhada. Podètz escriure de letras que meton en valor lo sens que portatz personalament als eveniments e a las experiéncias.